Asan keks (mürəbbəli)

    Hər kəsə yeni ilin ilk günlərindən salamlar. Bu aralar günlər günəşli keçsə də havada qışın şaxtası hiss olunur əməlli-başlı. Hələ bir də axşam oldumu hər yer buz bağlayır. Belə havada evdə oturub heç yana çıxmaq istəmir insan. Adyala bürünərək bir  tərəfdə oturmaq,  əlindəki bir fincan isti çay və ya qəhvəni içərkən qurtum-qurtum ən sevdiyin kitabın maraqlı dünyasında qeyb olmaq istəyirsən... Çayın yanında ləzzətli bir keks də oldumu dəyməyin keyfimə :) Bu gün sizi çox yormadan asan başa gələn, eyni zamanda çox ləzzətli və maraqlı bir keks resepti ilə tanış etmək istəyirəm. Bir də gördünüz ürəyiniz istədi və ya uşaqlar sizdən bir şirniyyat hazırlamağınızı xahiş etdi, amma, baxdınız ki, evdə şəkər qurtarıb. Yəqin ki, həmən vaz keçərsiniz bişirməkdən. Eee şəkərsiz şirniyyatmı olar? Qaldı sabaha -deyə düşünməyin bu resept elə tam belə ekstrimal günlər üçündür. Nə isə çox uzatdım keçirəm keksimizə.

Lazım olan ərzaqlar:

3 yumurta

2 stəkan mürəbbə

1 stəkan süd

1 stəkan duru yağ

2 stəkan un

1 qabartma tozu

1 vanel

Hazırlanma qaydası:

● Əvvəl yumurtalar mikserlə aşağı xodda bir az çalınır.
● Sonra üzərinə mürəbbə də əlavə olunub daha yüksək xodda 5-10 dəqiqə təkrar çalınır.
● Üzərinə ardıcıllıqla süd , yağ, ən axırda isə un, qabartma tozu və vanel əlavə olunur.
● Yağlayıb, unladığınız istədiyiniz formalı keks qəlibinə tökülür
● Əvvəlcədən isidilmiş 175 °-li sobada ustü qızarana qədər bişirilir.
● Bişdikdən sonra bir az soyumuş keksin üzərinə nazik təbəqə şəklində mürəbbə suyu çəkilir. Xırda doğranmış qoz və ya fındıq səpilir.
● Vəəəə bu qədər... Keksimiz hazırdır. İsti çayın yanında nuşi-canla yeyilir:)

Qeyd: İstədiyiniz mürəbbədən istifadə edə bilərsiniz. Mən əlimdəki meyvəsiz mürəbbə suyunu dəyərləndirdim. Lakin meyvə dilimli və ya giləli mürəbbə ilə daha mükəmməl bir ləzzət əldə olunacağına əminəm. Sadəcə istifadə edəcəyiniz mürəbbənin meyvələrinin tumlu olmamasına diqqət edin. Allah eləməmiş dişlərimiz gedər arada:)))

    Sevgilər....