Baharın ilk müjdəçisi

   

     

   Bu gün güllü-çiçəkli, barlı-bərəkətli Novruz bayramının 4 müjdəçisindən birincisi Su çərşənbəsi elimizin-obamızın qonağıdır. 

   

   Novruza addım-addım yaxınlaşarkən hər 4 həyat ünsürünün adı ilə bağlı çərşənbələri qeyd etmək qədim adətlərimizdəndir.

   

   Qədim türklər Tanrının insanı məhz çərşənbə axşamı yaratdığına inanırdılar. Onların inancına görə əvvəlcə su götürülüb, su ilə torpaq külək tərəfindən qarışdırılıb, insan şəklinə salınıb, günəşin altında qurudulub, dördüncü çərşənbədə - ilin axır çərşənbəsində isə ona nəfəs verilib. Beləliklə, dünyaya insan gəlib. Odur ki, Su çərşənbəsindən sonra od, yel və torpaq çərşənbələri qeyd olunur. Hər birisinin öz anlamı, öz adət-ənənəsi, mərasimləri var.

   

   Suların isinməyə başladığı su çərşənbəsinə "Əzəl çərşənbə", "Sular Novruzu" da deyirlər.  Bayram yaxınlaşrkən bütün evlərdə, həyətdə dərindən təmizlik və abadlıq işləri aparıldığını bilirik. Su çərşənbəsində məhz su mənbələri təzələnir, arxlar qaydaya salınır, su hövzələrində abadlıq işləri görülür.
          
   Bundan başqa həmin günə məxsus bəzi inanclar və adətlər də var. Məsələn, su çərşənbəsi günü hələ gün doğmamışdan hamı su üstünə gedir, əl-üzünü yuyur, bir-birinin üzərinə su çiləyir, su üstündən atlanır, yaralıların yarasına su çiləyirlər. Xalqın inamına görə, Su çərşənbəsi günü "təzə su"dan keçənlər, azarını, bezarını ona verənlər il boyu xəstəlikdən uzaq olarlar və gələn ilə kimi həyatları su kimi təmiz və şəffaf olur.

   Və təbii ki, bu çərşənbədə digərlərində olduğu kimi hər bir həyətdə tonqal qalanır. Plov, şirniyyatlar hazırlanıb süfrə bəzənir. Süfrənin əsas komponenti isə sürəhidə qoyulmuş şəffaf su olur.

   Bu inanclara bel bağlamaq nə qədər doğrudur mübahisəyə açıq bir bir məsələdir amma, bu çərşənbələrin qanımıza, canımıza bir bayram ab-havası kimi hopduğunu da inkar etmək olmaz. Çərşənbələrlə biz də yavaş-yavaş isinir, gələn bahar bayramının həyəcanını duymağa başlayırıq.

         

        Hər birinizə su kimi əvəzolunmaz və                       əziz olmanız diləyilə...

                Su çərşənbəniz mübarək !!!