Buludların qonağı

Bir az xəyal, bir az ümid 

Alsın məni bu dünyadan. 

Qoy, uçurub bir  keçirsin

Buludların arasından...

Gündoğumu vaxtı olsun.

Göyün üzü çəmçəhrayı 

Pambıq şəkəriylə dolsun.

Yüksəklərdən baxım yerə.

Gülümsəyim ordan baxıb

Kiçikləşən böyüklərə...

Səssizliyin huzuruyla

Dincəldikcə qulaqlarım,

Yalanlardan uzaqlarda

Qoy durulsun duyğularım...

Nəfəs alım...

Dərin-dərin nəfəs alım...

Məni sıxır aşağılar,

Geniş, azad məkanıyla

Dünyam olsun yuxarılar...

Əl sallayım ara-sıra,

Uçan şarın arxasınca 

Göyə baxan uşaqlara...

Gecələri enim yerə,

Dönüm əsən xəfif yelə.

Sığal çəkim gizlicənə

Sevdiyimin tellərinə...

Buludlarda yatım, durum

Gündoğumu vaxtı olsun.

Qalım yerdən uzaqlarda

Çəmçəhrayı bir diyarda...

Umman Aslan