Hər yazdığın məktubun çatanda əllərimə.
Kaş bir görə biləsən necə sevindiyimi!
Necə dəyərli olur bir parça kağız belə?
Dönür alova, oda yandırır əllərimi.
Gözlərim ac qurd kimi yeyir sətirlərini,
Dolanır cümlələrin məchul aralığında.
İsladır göz yaşlarım quraq kirpiklərimi,
Həsrətin selə dönür qızarmış yanağımda
Axı sənin ürəyindən süzülüb hər kəlimə,
Duyuram cümlələrdə qəlbin döyüntüsünü.
Hər hərif əllərindən bir ərmağandır mənə,
Görürəm sətirlərdə məhcub təbəssümünü.
Əllərin əlimdədir, sanki gözün gözümdə.
Saçlarının ətrini, nəfəsini duyuram.
Bu bir parça kağıza mat qalıram özüm də.
Dözə bilməyib tez-tez məktuba sarılıram.
Umman Aslan
İyul - 2023
Hiç yorum yok:
Yorum Gönder