Sobada kartoflu kotlet

   Hərarətli Ramazan günündən hər kəsə salamlar! Çox şükür bu il də Ramazanımız bol qonaqlı, bərəkətli keçir. Bu ayın ən sevdiyim cəhətlərindən biridir bu. Hər gün başqa qonaq və bişirəcəyin başqa-başqa yeməklərin həyəcanı... Təkrar olmasın deyə hər gün fərqli, yeni yemək resepti axtarışına çıxmaq... Vəə nəticədə bir ay kimi qısa zamanın sonunda xeyli yeni resept siyahısına sahib olmaq :))

  

   Bu gün bəlkə mən də həmin siyahınıza bir qatqıda buluna bilərəm ümidilə bir resept paylaşmaq istəyirəm burdan. 

   Əslində, bütün yazılarımı heç qaçırmadan oxuyan yorumsuz canlarımdan biri neçə vaxtdır bloqda resept paylaşmırsan demişdi söhbət əsnasında. Doğurdan da xeyli zaman olub heç bir resept qeyd etməmişəm bura. 

   Adətən, şirniyyat və salat reseptləri paylaşdığım halda bu gün Ramazana özəl olaraq bir yemək resepti təqdim etmək istədim sizə. İftar üçün bişirib çox bəyəndiyimiz bir yemək - Sobada karoflu kotlet. Əvvəlcədən qeyd edim ki, çoox bərəkətli yeməkdir və də çoox ləzzətlidir və də iftar üçün əla alternativdir. 

   Keçək lazım olan ərzaqlara:

Kotlet üçün:

400-500 qr çəkilmiş ət

1 soğan

1 yumurta

1 dilim boyat çörək və ya 2 x/q toz suxari

2-3 diş sarımsaq

1-2 qanad cəfəri

duz, istiot, kimyon

və

2 ədəd soğan

2-3 ədəd pomidor

3-4 ədəd kartof

2 ədəd uzun bibər

Sous üçü:

2 x/q tomat

2 x/q duru yağ

2 stəkan su

duz, istiot

                    Hazırlanma qaydası:

  ● Ət və digər ərzaqların hamısı yaxşıca qarışdırılır.

  ● Kotlet kimi hazırlanıb bir qaba düzülür.
  ● Soğan çox da nazik olmayacaq şəkildə aypara kimi doğranır. Yağlanmış ortaboy borcama tökülür. 

  ● Kartof soyulub, çox nazik və də çox da qalın olmayacaq şəkildə halqa-halqa doğranır.
  ● Pomidor da eynilə doğranır.

        
  ● Ərzaqların hamısı hazır olduqdan sonra keçirik işin ən əyləncəli qisminə.Bir kartof, bir kotlet və bir pomidor və təkrar bir kartof, bir kotlet, bir pomidor olmaqla yanyana sıra ilə düzülür. 

   ● Bitdikdən sonra üzərinə  acı bibərlər uzunasına doğranıb qoyulur.

       
   ● Kənarda bütün sousa aid ərzaqlar qarışdırılır.
   ● Və hazır kotlet-kartof sıralarının üzərinə gəzdirilərək tökülür.
   ● 200°-li sobada bişirilir.

   ● Vəə ləzzətli kotletimiz hazırdır. Bişirib yeyən hər kəsə nuş olsun.