Hekayəm

Bir hekayəm var uzaqlarda bilirəm... Yazılmağı gözləyən...

Bir xəyalın qanadında,  

bir ümidin sorağında, 

bir ümmanın qırağında,

yazısının marağında 

bir hekayəm var bilirəm...

Səbrlə o böyük günün gəlməsini, 

yazıldıqca sözlərinin sevinməsini, gülməsini istəyən 

bir hekayəm var bilirəm...

Sədaqətlə yollarıma göz dikən,

başqa heç kimsəyə qapılarını açmayıb, sirlərini saçmayıb, 

heç bir yerə qaçmayıb 

yerindəcə ona gedişimi gözləyən 

bir hekayəm var bilirəm...

Sadəcə məni istəyən...

Yazdıqca ən ülvi,

ən məhrəm duyğularına toxunacağım,  əsrarını qoruyacağım, 

mən yazarsam layiqincə oxunacağın bilən bir hekayəm var bilirəm...

Yazdıqca dərd yükündən qurtulacaq, kəlimələri zəbt edən zəncirləri qırılacaq, bambaşqa bir aləm, 

bambaşqa bir dünya qurulacaq

bir hekayəm var bilirəm...

Ümidlərə sarılan,

gözləməkdən yorulan 

kəlimələr xəzinəsində uyuyan

bir hekayəm var bilirəm...

Qayğılardan sıyrılıb,

bu xaosdan ayrılıb

axır bir gün ayılıb 

söz verirəm gələcəm...

Mən yanına gələcəm...