Keç məndən, həyat...

Keç sən məndən, həyat, keç sən...

Çox tənbələm, çox da yorğun...

İstədiyin  kimi deyiləm, 

Mənim başqadır qanunum...

Qərib diyarda kimiyəm

Həm də ki yorğunam, yorğun...

Özümü tapmaq üçün
 çıxdığım
 yolçuluqlar yorur məni...

Tapdığımı qavramaq üçün
boğuşduğum
 bataqlıqlar yorur məni...

Hayqırdığım susqunluqlar, 

Qələbəlik yalnızlıqlar,

Gur işıqlı qaranlıqlar,

yorur məni...

Bir də yalanlar yorur...

Riyalar, kibirlər yorur...

Uğurlarından danışan uğursuzlar,

Şəfqətindən danışan amansızlar,

Bacarığından dəm vuran yararsızlar

yorur məni...

Gördüklərim yorur məni...

Duyduqlarım yorur məni...

Danışığı ilə zəhər yayanlar,

Özlərini böyük sananlar

Məsləhəti ilə adam boğanlar

Yorur məni...

Məhkəməsiz "hakimlər",

Heç susmayan "müəllimlər",

Və zoraki seçimlər

yorur məni...

Anlayırsanmı?!

Çox yorur...

Ədalətsiz tənqidlər yorur məni,

Dar görüşlü məntiqlər yorur məni,

Bir də çoxbilmiş tiplər ...

çox yorur...

Odur ki, həyat, keç sən məndən...

Çox tənbələm, çox da yorğun.

İstədiyin  kimi deyiləm, 

Mənim başqadır qanunum...

Umman Aslan

06.04.2020
 02:01