İçimdəki mənə...

     
   
    Bir mən vardır məndə məndən içəri...

         (İçimdəki mənə səslənişimdir...)

    Səncə istədiyin budurmu?! Sən istədiyin sənsənmi? Bu cür davam etməyə razısanmı? Məncə... Məncələrim çoxdu...

    Məncə çox kiçik şeylərə taxılıb qalırıq, onlarla məşğul olarkən ömürdən axıb gedən böyük sürprizlərdən bixəbər qalırıq, səncə?

    Məncə insan qərarlarının arxasında durmağı bacarmalıdır, özünə güvənməli, inanmalı, hər şeyin öhdəsindən gələ biləcəyini anlamalı, səncə?

    Məncə insan ətrafındakı hər kəsi sevməlidir, pislik edənlərə belə mərhəmətlə baxmalı, qəlbi sevgi hissindən məhrum o zavallılara acımalıdır, səncə?

    Məncə hər şey mənəviyyatda bitir, dünya işlərinə daldıqca, bədəni zövqlərimizin ardına düşdükcə, qəlbimizi, ruhumuzu qidasız buraxırıq, soldururuq, öldürürük, səncə?

    Məncə bir-birimizə vaxt ayırmalıyıq, dinləməliyik, dərdimizi danışıb yüngülləşməli, sevincimizi bölüşüb çoxaltmalıyıq, səncə?

    Məncə belə getməyəcək, bir gün hər şey düzələcək, səbəbsiz göz yaşları bitəcək,  o qosqocaman boşluq sevinclə dolacaq və hər şey yaxşı olacaq, səncə?

    Məncə bitdi deyə bir şey yoxdur, yenə yenidən başalana bilər hər şeyə, heç nəyə aldırmadan, səni geri çəkən düşüncələrdən arınaraq, səncə?

    Məncə artıq başqa yerdən gələcək ilhamlara inanmaq əbəsdir, sən istəmədikdən, sən "olacaq" deyib inanmadıqdan sonra hər şey nafilə... Səncə?

    Səncə də bəs deyilmi?!... Bu gedişata dur demək vaxtı çatmadımı?!.. Nə olursa olsun vaz keçməməyə, sevdiyin şeylər üçün mücadilə etməyə və "yenidən" deməyə dəyər , məncə...