Bir yol verin, bir yol mənə
Bu günümdən o başlayıb
Qoy uzansın keçmişimə.
Bu günümdən addımlayım
Yavaş-yavaş dünənimə
Baxa-baxa keçənlərə
Gedib çıxım ötənlərə...
Bu yolumun gəlişi var gedişi yox
O günlərə bu yolun bir dönüşü yox
Görüm səssiz, kimsəsizdir uzun yolum,
Odur ki, ot-ələf basıb hər bir yanın.
Görüm burda yaxın gəlir uzaq mənə
Boylanım ötən ömürə bir də baxım
Gəldiyim sürətlə deyil, dünənimə
Asta-asta, yavaş-yavaş gedim çıxım.
Həyatımın hər anında bir az durum,
Baxım bahar qoxan ürkək gəncliyimə.
Qayğı dolu o qızı qoy, qucaqlayım
Dərman olum qəlbi qırıq günlərinə.
Gedim gedim,
qaçım bir az mən qabağa.
Bir də baxım uşaqlığım önümdədir.
Görüm addımım balaca,
Görüm dünya böpböyükdür.
Görüm yenə uzun saçım hörüklüdür.
Görüm anam lent bağlayıb uclarına
Mən qaçdıqca onlar uçur ora-bura.
Qaçım belə qayğısızca,
Bir az daha irəlləyim...
Görüm yenə o günlər tək
sevinclə dolub ürəyim...
Qaçım qaçım...
Baxım durub atam yolda,
Xanım-xatın nənəm yolda.
Baxım mənə qucaq açıb hər ikisi.
Baxım əsir xoş günlərin əsintisi...
Sığınıb sevdiklərimin qucağına
Unudum dünyanın dərdini ,sərini
Şirin röya kimi varınca dadına
Qalım orda bir daha dönməyim geri.
Hiç yorum yok:
Yorum Gönder