Yenə gəldim :)

    Bəli... Gəldim... Buralardayam...
   Döndüm dolaşdım yenə bloqumda tapdım özümü...

   Arada gəlirəm. Bir şeylər qaralayıram bura. Sonra gələcəm deyə söz verib yenə qeyb oluram 😑

  Bu aralar çox şey keçdi həyatımdan... Acı, şirin... Qazanclar və itirdiklərim...


   Kərbəla ziyarəti və bu ziyarətdə başıma gələn olmazın hadisələr, bu hadisələrin mənə qazandırığı mənəvi dəyərlər və buraxdığı unudulmaz izlər(bəlkə başqa bir yazıda bu məsələyə toxunaram);
  Quba səfəri, səyahəti sevməyən övladlarımızla bu səfərdə verdiyimiz imtahan (😏);
   Evdə atlatdığımız yanğın və hələ də qosqoca evin o yanğından necə bu qədər yüngül qurtardığını düşündükcə şok olmamız;
   Bəzən uzaqlığından şikayətlənsəm də artıq alışmağa başladığım şirin, sakit qəsəbəmizdən, səsli-küylü Bakıya, müstəqil çiçəkli-böcəkli həyət evindən beton yığınları arasına daşınmağımız və bu böyük şəhərdə yeni bir düzən qurmağın çətinliyinin qorxusu;
   Buralarda ailəmdən qalmış yeganə təsəllim anamın  başqa ölkəyə - qardaşımgilə köçməsi;
   Bunca şeylərin arasında bu aralar Rəbbim tərəfindən ciddi şəkildə mənəvi baxımdan imtahan olunmağım;
   Və nəhayət, bu il biabırçı şəkildə keçirilən aylardır hazırlaşdığım  MİQ imtahanına sıxıntılarıma birini daha əlavə etməmək üçün hər kəsi şok edərək radikal bir qərarla girməkdən imtina etməyim...

   Daha da sayımmı?! 😊

   Hər birini anlatsam uzun bir hekayə çıxar ortaya. Çox ah-vahlanıb, sıxıntılı şeylərdən yazmağı xoşlamıram bilirsiniz. Odur ki, uzatmıram. Necə ki, həyat fəlsəfəm həmişə irəliyə baxıb, sıxıntıları əlimdən gəldiyi qədər tez bir zamanda unutmaqdır. Yazılarımda da buna uymağa çalışıram. Həyatın qazandırdıqlarını, pozitiv tərəflərini görüb, göstərməkdir tək istəyim.
Belə...

   Düzənli yazı yazacam bloguma deyə söz verməyəcəm bir daha. Çünki sabahkı günün bizə nələri gətirəcəyini bilmirik.

   Sadəcə hələ də buralarda olduğumu xəbər etmək istədim.

   Bir də fürsədən istifadə edib bayramınızı təbrik etmək.

   Rəbbim bu ilki qurbanlarınızı qəbul etsin, neçə gözəl bayramlara çıxarsın inşəAllah. Hər bayramı sevdiklərinizin əhatəsində, bol ruzili süfrə ətrafında, hüzurlu və məsud bir qəlblə keçirməyi nəsib etsin.

   Ümid edirəm ki, siz də oralardasınız 😊Məni tək qoymayacaqsınız.❤

   Sevgilər...