Kakos surprizli keks

                                         
    Hər kəsə qucaq dolusu salamlar. Bu gün yenə ləzzətli bir reseptlə qarşınızdayam. Doğrusu bizim evdə şirniyyat olaraq ən çox keks bəyənilib, iştahla yeyildiyinə görə mən də həmişə fərqli keks reseptləri axtarışında oluram.  İnternetdə axtarış zamanı qarşıma çıxan bu günkü keks ilk olaraq görüntüsü ilə könlümüzü fəth etmişdi. Bişirib dadını da çox bəyəndiyimiz üçün bloq yaddaşımda da yer alsın istədim. Beləliklə keçək keksimizə lazım olan ərzaqları və hazırlanma qaydasını anlatmağa.

Keks xəmiri üçün

3 yumurta

1stəkan şəkər

0,5 stəkan süd

0,5 stəkan duru yağ

1,5 stəkan un

1 paket qabartma tozu

3 xörək qaşığı kakao

İç üçün

2 yumurtanın ağı

1 stəkan şəkər kirşanı

2 stəkan kakos

Üzəri üçün

Şokolad (ağ və qara)

                       Hazırlanma qaydası

• Əvvəl içi hazırlayırıq. Yumurtanın ağı, şəkər kirşanı və kakos qarışdıralır.
• Kakoslu qarışıqdan 9 ədəd qozdan azca böyük yumru toplar hazırlanır.
• Kakoslu toplar düz bir qaba yığılaraq soyuducunun buz gözünə qoyulur.
• Keksin xəmiri üçün yumurtalar şəkərlə birlikdə ağaranacan mikserlə çalınır.
• Süd və yağ əlavə olunub təkrar çalınır.
• Ən sonda qarışığa un, qabartma tozu və kakao da ələnərək əlavə olunub qarışdırılır.
• Yağlanıb unlanmış keks qəlibinə xəmirin yarısı tökülür.
• Qəlibdəki xəmirin üzərinə soyuducudan çıxardığımız kakoslu toplar bərabər aralıqlarla düzülür.
• Qalan xəmir də kakoslu topların üzərinə tökülür.
• Əvvəlcədən isidilmiş 180°- lik sobada bişirlir.
• Bişib soyumuş keksin üstü zövqə görə əridilmiş şokoladla bəzədilir.
• Görüntüsü ilə göz oxşayan keks dilimlənərək ləzzətlə yeyilir :)

 Keksi tez bir zamanda bişirib bəyənəcəyinizi ümid edərək bitiririk bu postu. Sonda isə hər kəsə ləzzət dolu günlər və qucaq dolusu sevgilər ...