Portağallı kələm salatı (və ya turşusu)

           

    Çox fərqli bir salat resepti ilə qarşınızdayam. Bəri başdan deyim ki, rus mətbəxindən gələn bu salat hər kəsin ağız dadına uyğun olmaya bilər. Məsələn bizim ailə bu salatı sevənlər və bir daha yemək istəməyənlər olaraq iki ayrı qrupa bölündü:) Portağalın aromasını və qoxusunu sevənlərdənsinizsə bu salatı da bəyənəcəksiniz. Mən çox bəyəndim, ona görə də siz dəyərli oxuyucularla da paylaşmaq istədim.
Elə isə keçək salatımız üçün lazım olan indriqentlərə və  onun hazırlanma qaydasına:

Ərzaqlar:

3 kq - kələm

500 qr - balqabaq

1 ədəd - portağal

1 l - su

50 qr - alma sirkəsi

100 qr + 2-3 xörək qaşığı - şəkər

15 qr - duz

           

                  Hazırlanma qaydası:

●  Kələm incə-incə doğranır.

● Balqabaq soyulur, istəyə görə ya xırda-xırda doğranır, ya da sürtgəcin böyük gözündən keçirilir.

● Balqabağın üzərinə şəkər əlavə olunub, suyunu buraxanacan saxlanılır. 

● Sonra balqabaq suyu ilə birlikdə kələmlə qarışdırılır.

● Portağal soyulur, xırda-xırda doğranır və kələm balqabaq qarışığına əlavə olunur.

● Kənarda 1 l su , 15 qr duz, 100qr şəkər və 50 qr alma sirkəsi qarışdırılır. Kələmli qarışığın üstünə tökülür.

● 1 gün soyuq yerdə saxlanılır və ertəsi gün nuşi- can edilir:)

Qeyd: 1. Portağal kələmin bildiyimiz ağır qoxusunu dəf edərək xoş bir tam qatır salata. 

2. Salatı şüşə bankada uzun müddət saxlamaq olur. Buna görə də onu turşu da adlandırmaq olar.

3. Və alışdığımız sarımsaqlı-sirkəli ağır turşuların əvəzinə kəmşirin və aromalı xəfif bir turşudur.

                         Sevgilər....