Mən yoruldum, bahar!

      
   Salam əziz dostlar! Buralar üçün o qədər darıxmışam ki əslində... Amma bloqa nə illah etsəm də  yaza bilmirəm bir müddətdir.

   Mən bir an öncə bahar gəlsin, enerjilərimiz yüksəlsin, əhvalımız düzəlsin deyə gözlədiyim halda son günlər bir yorğunluq, bir yuxudan doymamazlıq başlayıb ki, gəl görəsən.  Üstəlik hər tərəfimin ağrıması, davamlı ürəyimin sıxılması, həssaslıq, tez-tez yeri gəldi-gəlmədi ağlamaqlar, depressiv hallar da bir tərəfdən ....


   Heç nə etməyə həvəsim olmur, bütün işlər gözümdə böyüyüb dağ olur. Nə kitab oxuya bilirəm, nə yazı yaza. Bir bezginlik havası ilə sadəcə istədiyim uzun bir səyahət və təbiətin qoynunda 2-3 günlük bir tətil. Bir tək bunlara bir az həvəs duyuram içimdə. O da uşaqların dərsi, yoldaşın işi ... Qısaca, bu aralar reallaşması qeyri-mümkün olan bir istəkdir.

 
   Qalmışdım məətəl ki, bu nə haldı? Nə baş verir belə? Çünki normalda həyata pozitiv yanaşan biri olaraq ən xırda şeylərdən zövq almağı bacaran, olmayan yerdən başımı qata biləcək, mənə özümü yaxşı hiss etdirəcək bir iş çıxaran insanam. Bu halımı yüz yerə yozub, yüz  diaqnoz qoydum özümə :) 

   Sonra bir yaxınıma danışarkən yaz havasının cansıxıcı olduğunu ondan ola biləcəyini söylədi. Ordan ağlıma hardasa gözümə ilişmiş "bahar yorğunluğu" termini gəldi. İnternetdə bir az araşdırdım və deyəsən dərdimi tapdım :)

    Sən demə mən doğurdan da bahar yorğunluğu yaşayırmışam. Bu yorğunluğun əlamətlərini oxuduqca "eyni mən" dedim...
Normalda havanın vəziyyətinə görə əhvalı dəyişən insanlardanam. Günəşli havada şən-şaqraq, soyuq, xüsusən buludlu boz havalarda isə yorğun, dünyanın bütün dərdi üstümdəymiş kimi hiss edirəm. Amma daha bu qədərini bilmirdim. 

   Məyər mövsüm dəyişərkən insanın ruhunda da dəyişikliklər olurmuş. Düzü bunu öyrəndiyimə çox sevindim. Dərdi bilək ki, dərmanını da axtaraq tapaq, deyilmi?! Və bu haqda bəlkə mənim kimi bilməyənlər vardır deyə burda da yazmaq istədim.

Bahar yorğunluğu nədir?
Deməli anlaya bildiyim qədər anlatmağa çalışım. Vücudumuzda melatonin və serotonin deyə iki hormon vardır ki, bunlardan melatonin yuxu tənzimləyən, serotonin isə xoşbəxtlik hormonudur. Daha çox qaranlıqda ifraz olunan melotoninin miqdarı soyuq və qaranlıq qış aylarında serotonindən daha çox olur. Yazın gəlişi və günəş şüalarının artması ilə vücudda bu iki hormonun miqdarı bərabərləşir. Və bu hala həssas orqanizmlər asanlıqla adapte ola bilmir və bahar yorğunluğu dediyimiz hər 3 nəfərdən birində görülən bir narahatlıq yaranır. Bu hal 2-3 gündən başlayaraq 1 aya qədər davam edə bilir.
Qısacası, hər şey yenə hormonların başının altından çıxdı :)

         

Bahar yorğunluğunun əlamətləri:

İlk olaraq adından göründüyü kimi yorğunluq - bu adi işlərdən yorulmaqla yanaşı, bütünlükdə yaşamaqdan,  həyatdan yorğunluğa qədər gedib çıxa bilir.
İkincisi yuxudan doymamaq- xüsusən,  səhərlər oyanmaq xeyli çətin gəlir.
Sonrasında oynaq ağrıları, narahatlıq, diqqətsizlik, əsəbilik də bahar yorğunluğunun əlamətlərindəndir.
Hətta bu dövrdə yaxalandığınız və keçib getmək bilməyən qrip belə bahar yorğunluğunun ərmağanıdır.

Bahar yorğunluğundan necə xilas olmalı?

Mövsümi hesab olunan, çox da ciddiyə alınmayan bahar yorğunluğunun qarşısı alınmadıqda ciddi depressiyaya belə aparıb çıxara bilir. Ona görə də bir an öncə bu dərddən xilas olmaq lazımdır. Bunun üçün mütəxəssislər aşağıdakıları tövsiyə edirlər:
- bol-bol su içmək
- tez-tez havaya çıxıb gəzmək
- günəş şüalarının bədənə təmas etməsinə imkan yaratmaq
- zərəli qidalardan uzaq durub bol meyvə və tərəvəz yemək
- idmanla məşğul olmaq
- arada dost və rəfiqələrlə görüşüb zaman keçirmək

   Bu gündən etibarən mən də diqqətə almağa çalışacam bu tövsiyələri. Baxaq görək bahar xanımın bu əziyyətindən xilas  ola biləcəyikmi? :)

   Sizdə necə, aranızda bahar yorğunluğuna yaxalanan varmı? Bəs sizdə hansı əlamətlər özünü göstərir? Varsa yorum qismində bizimlə paylaşsanız çox şad olarıq.

   Hər kəsə bol günəşli, şən əhvallı, enerji dolu günlər diləyilə... Sevgilər...