Qozlu mütəkkə

        
   Havaların gah günəşli, gah yağışlı keçdiyi şıltaq yaz günlərindən hər kəsə salam olsun !!!
  
   Yağış demişkən dünən ilk dəfə dolu yağışına şahid oldum.  İlıq, çiçək qoxulu bir bahar havasında həftə sonunu dəyərləndirmək üçün çıxdığımız  gəzintidən gecə gec saatda dönəsi olduq.
   

   Biz maşına minərkən ildırımlar çaxmağa başlamışdı. Bir az yol getmişdik ki,
tappa-turuplu bir dolu başladı ki, gəl görəsən. Maşının üstünə, şüşəsinə dəyib elə səslər çıxarırdı ki, açığı maşının əziləcəyindən belə qorxduq. Hətta bir ara maşını əmniyyətli bir yerə çəkib saxlasaqmı deyə ağlımızdan keçirdik. Nə isə ki, sağ-salamat gəlib evə çıxdıq.
   

   Amma dolunun ürküdücü yanına da şahid olduq.

   

   Bahar yorğunluğunu yavaş-yavaş atlatmağa başlamışkən bir şeylər hazırlayıb günümüzü şənləndirməyə çalışırıq. Fərqanə bacımın bizə ziyarətə gələrkən bişirib gətirdiyi və hamımızın çoox bəyəndiyi  qozlu mütəkkədən iki gün öncə mən də bir bişirim dedim. Bişirdim və yenə ləzzətindən çox razı qaldıq. İş belə olunca neçə vaxtdır bloqda bir resept paylaşmıram düşüncəsilə burada yazmağa qərar verdim.  Vəə beləliklə uzuun bir girişdən sonra reseptlə sizləri baş-başa buraxıram :))

  Xəmir üçün:

250 qr kərə yağı

2 x/q şəkər

1 st. qatıq+ 0,5 ç/q soda

2 yumurta sarısı

Aldığı qədər un (təx. 4 - 4,5 st)

İç üçün:

1,5 st qoz

1,5 st şəkər

2 x/ q mürəbbə suyu

2 yumurta ağı

Hazırlanma qaydası:

● Kərə yağı, şəkər, qatıq+soda, yumurta sarıları qarışdırılır.
        

● Üzərinə az-az un əlavə olunaraq xəmir yoğrulur. Xəmir yumşaq, lakin, yayıla biləcək halda olmalıdır. 

        
● Yoğrulmuş xəmirdən 4 kündə tutulur. (Mənim nədənsə 6 kündə yadımda qalmışdı. Şəkil sizi çaşdırmasın :) )

        

Digər tərəfdən içi hazırlayırıq.
● Blenderdən və ya qoz çəkən maşından keçirilmiş qoz şəkərlə qarışdırılır.
● Üzərinə yumurta ağı və mürəbbə suyu da əlavə olunur.

        
● Xəmir yayılır. 6 və ya 8 yerə üçbucaq şəklində bölünür( 4 kündə olduqda 8 yerə bölmək lazımdır). 

        
● Üçbucağın geniş tərəfinə içlikdən qoyulur. Hər iki tərəfi içə doğru qatlanıb rulet kimi bükülür.
        

● Yağlı kağız sərilmiş formata az aralıqlarla düzülür. 

        
● 180°-li öncədən isidilmiş sobada bişirilir. Üstünün çox qızarmamasına diqqət etmək lazımdır.

   Və beləliklə qozlu mütəkkəmiz hazırdır.Nuş olsun!!!
        
   Kövrək və çox ləzzətli bir şirniyyatdır. Bişirib dadına baxın mütləq deyirəm. Və burda yazımı sona çatırıram. Başqa bir yazıda görüşmək diləyilə sağlıqla və bizimlə qalın :))
                       Sevgilər...