Konseptli ad günlərimiz

   Bizim ailədə yeni bir ənənə başlayıb. Uşaqların ad günlərini həm əyləncəli, həm də yaddaqalan keçirmək üçün onların istədiyi bir konseptə uyğun qeyd edirik.

  

   Bu cür ad günlərini ilk dəfə internetdə görəndə çox bəyənmişdim. Bizdə də belə ad günü hazırlayan şirkətlər varmı deyə çox aradım. Qarşıma bahalı və dəbdəbəli ad günü təşkilatçıları çıxdı. Heç biri sadə vətəndaşın büdcəsinə uyğun gəlməyən belə ad günü təşkilatçılarının istədiyim bir tərzdə ad günü  nümunələrini görə bilmədim.

  Çox bahalı və təmtəraqlı məclisləri gərəksiz gördüyüm üçün sevmirəm mən doğrusu. Tək istədiyim ad günlərini uşaqların yaddaşına gözəl bir gün kimi həkk edərək, onları sevindirmək idi. 

   Sonra yenə internerdən bir çox anaların özlərinin bu işlə məşğul olub,  ortaya gözəl bir iş çıxardıqlarının şahidi oldum. Görəsən mən də bacararammı deyib başladım fəaliyyətə.  

  Konseptli ad gününə məxsus cəhətlər : temanın rənginə uyğun bolluca şarlar, bannerlər, kreativ bəzəklər və yemək süfrəsindən əlavə yenə temaya uyğun tort, cupcake və başqa şirniyyatlarıdan ibarət stend-masa hazırlamaqdır.

    İlk olaraq 2 aylıq bir hazırlıqdan sonra baş tutan və hər kəsin marağını və təqdirini qazanan körpəmin bir yaşını qeyd etdiyimiz ad günündən sonra başladı hər şey. Bu rəngarəngliyi görən digər uşaqlar da təbii ki, öz ad günlərini eyni ab-havada görmək arzusuna düşdülər. O gündən etibarən ailəmizdəki balaca uşaqların hər birisi üçün hədiyyə olaraq növbə ilə konseptli ad günü partisi hazırlayırıq.

   Bu ad günlərinin bloqumun yaddaşında qalması, həm də oxuyanlara bəlkə yeni bir ideya verib, faydası olar düşüncəsi ilə çox detallara enmədən burada qeyd etmək istədim.
  

   İlkin olaraq körpə Səlimimin bir yaşını qeyd etdiyimiz təyyarə konseptli ad günümüzdən başlamaq istəyirəm. Qeyd edim ki, bu ad gününün bütün parçalarının ideyası da, dizaynı da özümüzə məxsusudur. Bircə tortu sifarişlə bişirtdirmişdik.

Bu da Səid balamızın Spiderman konseptli ad günü. Yayda, adətən, kənddə dincəldiyimiz üçün ad gününü həyətdəki çardaqda keçirdik. Və kənddə yaşayan qohum-əqrabanın, xüsusən də ordakı uşaqların xeyli marağını çəkmişdi bu parti. Tortu bir təhər özümüz etməyə çalışdıq. Məncə pis də alınmadı.

   Və futbol xəstəsi olan böyük oğlum Abdullahın futbol temalı ad günü. 13 yaşı olan yeniyetmə balamızın partisində nisbətən sadə bəzəklərdən istifadə etdik. Yenə hər şey kimi tort da öz əl işimizdir :)

   

   Balaca prinsessamız Mədinənin 3 yaşı - Hello kitty konseptli ad günümüz. Sitarə bacımla hamını yatırıb gecə yarılarına qədər deyə-gülə bəzəmişdik evi. Bunun da bir başqa ləzzəti var. Mənim əyri-üyrü tortlarımdan fərqli olaraq tort canım bacımın sənət əsəridir :)

   Vəə son olaraq cimcimə Zərifşanın Maşa və ayı temalı ad günü. Bir həftə öncəsindən öz ad günü üçün rəngli kağızlardan bəzək hazırlayan 7 yaşlı Zərişim surpriz ad gününü öyrəndikdə xeyli sevinmişdi.  Burdakı tort da öz əməyimizin məhsuludur.

      

Hər dəfə hazırlıqlara başlayanda və proses boyu bu nə işdi başıma açmışam deyə içimdən keçirmirəm desəm yalan olar. Çünki belə işlər qabiliyyətdən daha çox səbir istəyən işlərdir. Lakin hər ad günündə səbəbkar uşaqların üzündəki sevinci, qonaqların məmnuniyyətini və sonradan uzun müddət həmin ad günündən danışılaraq yaddaşlarda qalmasına nail olduğumuzu gördükdə nə yaxşı ki, etmişəm deyib, həvəslə növbəti uşağın ad günü hazırlığına başlayıram :)

 Hələ qarşıda Dinozavr və Batman temalı ad günlərimiz durur. Görəsən necə alınacaq deyə böyük həyəcanla hazırlıqlara başlamışam belə. 

   Siz necə, konseptli ad günlərini sevirsinizmi? Uşaqlıqda biri sizə ən sevdiyiniz cizgi film qəhrəmanı və ya hər hansı bir nəsnəyə uyğun surpriz ad günü partisi hazırlasaydı nə düşünərdiniz? Sevinərdizmi? Bu mövzuya baxışınız mənim üçün çox maraqlıdır. Yorum olaraq fikirlərinizi buraxsanız çox sevinərəm.

   Hər kəsə gözəl günlər və sevgilər...