Şaftalı ilə yay tortu

        

   

   Salam olsun bu yazını oxuyan bütün canlara. Günlər necə keçir? İstilərlə aranız yaxşıdırmı? Mən şəxsən artıq bir an öncə havalar sərinləsin, yağışlar başlasın deyə gün sayıram.

   Belə isti havalarda insanın ürəyi ancaq sərin və yüngül qidalar istəyir. Ağır və yağlı qidalardan isə hamı uzaq qaçır. Mən də yaya uyğun bir tort resepti paylaşmaq istəyirəm sizinlə.

   Tortun əsas maraqlı cəhəti kremindədir. Belə ki, krem üçün yağdan istifadə etmirik. Arasına və bəzəmək üçün üzərinə düzdüyümüz şaftalı isə tam yay tortu ünvanını qazandırır bu şirniyyata. Buyurun reseptlə tanış olaq:

Biskvit üçün:

3 yumurta

2 stəkan şəkər

1 stəkan qatıq

1 stəkan duru yağ

3 stəkan un

1 qabartma tozu

1 vanel

Krem üçün

3 ədəd yumurta

1 stəkan şəkər

Arası və üzəri üçün 

2 ədəd şaftalı

Hazırlanma qaydası

• Əvvəl biskvit üçün yumurtalar şəkərlə ağaranacan çalınır;
• Üzərinə növbə ilə qatıq və duru yağ əlavə olunur;
• Ən son un, qabartma tozu, vanel ələnib qarışdırılır;
• Formata tökülüb əvvəlcədən isidilmiş 180°-li sobada bişirilir.
• Krem üçün yumurta və şəkər bir qaba tökülür, qazda şəkər dənəcikləri itənə qədər qarışdırılaraq isidilir;
• İsinmiş və şəkər həll olunmuş qarışıq mikserlə ağarıb beze halına gələnə qədər çalınır.
• Şaftalılar qabığı soyulub nazik dilimlər şəklində doğranır.
• Bişmiş biskvit soyuduqdan sonra ortada eninə bölünüb iki yerə ayrılır.
• Arasına kremin yarısı sürülür. Bir şaftalının doğranmış dilimləri də düzülüb üzərinə biskvitin digər hissəsi də qoyulur.
• Qalan krem tortun üzərinə və ətrafına sürülür. Şaftalı dilimləri ilə zövqə uyğun bəzədilir.
• Vəə tortumuz hazırdı. Nuş olsun !!!